Hadhwanaag

Wergeyska oo qormadiisu aad u dheerayd isla markaana qormadaasi  taabanaysay taariikho iyo xogo uu ku iftiiminayo qoraalo la isku weydaarsaday khadka emailka oo ay is dhaafsadeen madaxa shariikadda Genel Energy Tony Hayward iyo la taliyayaasha dhinaca shiidaalka dawladda Soomaaliya, iyo weliba qoraalo ay sidoo kale gudbiyeen shariikadahii sannadahii 80-maadkii dawladdii militeryga ahayd ee Maxamed Siyaad Barre heshiisyada kula gashay qodista shiidaalka.

Haddaba qormadani oo aanu idiinka soo turjunay inta ugu nuxurka iyo muhiimadda badan ee sida gaarka ah u taabanaysa heshiiska shariikadda Genel Energy iyo xukuumadda Somaliland ee ku saabsana qodista shiidaalka ayaa joornaalku ama wergeyska Wall Street Journal wuxuu ku bilaabay qormadiisa sidani "Markii ay shariikadda Genel Energy ee ka diiwan gashan sayladda iibka ee magaalada London ay go'aansatay sannadkii hore inay shiidaal ka baadho Soomaaliya, shariikadda Genel umay tagin magaalo madaxda dalkaasi ee Muqdisho, ee waxay go'aansadeen inay safar ku tagaan Hargeysa oo ah magaalo ku taalla dhinaca waqooyi ee dalkii loo yaqaanay Soomaaliya oo 500 Mile dhinaca waqooyi ka xigta magaalo madaxdii wixii loo yaqaanay Soomaaliya ee Muqdisho"

Wergeyska Wall Street Journal isagoo qormadiisani ku faahfaahinaya heshiiskaasi ayaa waxaa lagu yidhi "Tony Hayward guddoomiyaha shariikadda Genel Energy wuxuu booqday magaalo dhas ama boodh maydhan ah oo la yidhaahdo Hargeysa, wuxuuna gurigiisa kulan kula yeeshay madaxweynaha Somaliland Axmed Siilaanyo, sida Wergeyska Wall Street Journal uu ka soo xiganayo wasiirka macdanta iyo shiidaalka Somaliland Xuseen Cabdi Ducaale, Mr. Hayward guddoomiyaha Genel Energy ayaa kulanka uu la yeeshay madaxweyne Siilaanyo wuxuu ku ballan qaaday inuu bixinayo lacag dhan $100 malyuun oo dollarka maraykanka ah si shariikadiisa Genel ay u hantido heshiisyada shiidaalka"

Mr. Hayward oo la hadlaayey warbaahintu wuxuu sheegay inuu kalsooni ku qabo in shariikadiisa Genel ay shiidaal ka soo saarayso Somaliland "waan ku kalsoonahay inaanu shiidaal ka heli doono halkani" ayuu yidhi Tony Hayward.

Wergeyska Wall Street Journal wuxuu faahfaahin ka bixiyey in shiidaal qodista shariikadda Genel Energy ay si weyn uga cadhaysiisay maamulka ka dhisan Muqdisho oo iyagu waraaq la mariyey khadka emailka u diray Tony Hayward, qoraalkaasi oo ay kaga cabanayeen in shariikadda Genel iyo Tony Hayward ay ku xad gudbayaan xeerka caalamig ah, isla markaana aanay awood u lahayn inay heshiis la gallaan maamul aan la aqoonsan waa sida wergeysku warbixinta u qorayo eh.

Wergeyska Wall Street Journal oo hellay nuqul ka mid ah waraaqda emailka ah oo uu qoray nin la yidhaahdo Patrick Molliere oo la taliye uga ah dawladda Muqdisho dhinaca shiidaalka ayaa waraaqdaasi wuxuu u diray Tony Hayward laftigiisa wuxuuna ku yidhi qoraalkaasi "waxaad ahayd maamulaha guud ee shariikadda BP oo ah kuwa dunida ugu weyn, waanad ogtahay haddaanad iska indho tirayn inaanad awood u lahayn inaad heshiis la gasho maamul aan la aqoonsanayn"

Wergeyska The Wall Street Journal oo hellay nuqulo qoraalo ah oo ay is dhaafsadeen madaxda shariikadda Genel Energy ayaa tibaaxaayey in madaxweynaha shariikadda Genel Energy ahaana ninka isagu aas aasay Mehmet Sipil iyo guddoomiyaha shariikadda Tony Hayward, waraaq uu Sipil u diray Hayward ayuu ugu sharaxaya sida uu ugu guulaystay sannadahii 2004 tii ilaa 2005-tii in ay qandaraasyada shiidaalka ka hantiyaan maamulka Kurdistaan oo ka tirsan dalweynaha Ciraaq, iyadoo shariikadda Genel aan habayaraate u marin inay ogolaansho ka hesho Baqdaad waa casimadda dalka Ciraaq eh, "waynu samayn kara, waxaan isticmaalay diblomaasiyiin ciraaqiyiin iyo kuridiyiin ah, jeebka ayuunba shaqaynaya waxaynu u baahanahay inaynu isticmaalo diblomaasiyiinta ingiriiska ah, si aynu Somaliland uga hello heshiiskani, uma baahnin inaynu Muqdisho maro, sababtu waxay tahay  waayo-aragnimadayda ayaa sidaasi odhanaysa" ayuu ku yidhi qoraalka emailka ah ee Mr.  Sipil uu  u diray Hayward sannadkii 2011-kii, sannad ka hor intaanay labada nin oo wada socda u baqoolen dhinaca Hargeysa heshiiskana ula gelin maamulka Siilaanyo.

Qoraalkani Wall Street Journal Muxuu Iftiiminaya

Wallow qoraalkani Wall Street Journal lagu daabacay uu u muuqdo mid ay qoreen dad aad uga soo horjeeda in Genel Energy ay shiidaal ka qodo Somaliland, oo lagu tilmaami karo inay ay yahiin maamulka Muqdisho laftigooda oo koodh kale usoo xidhay, oo iyagu olole ugu jira inay dilaan heshiiskani, ayaa haddana markaad dhinaca ka timaado wuxuu qoraalkani oo lagu daabacay wergeys ka mid ah kuwa ugu sumcadda badan dunidu, daaha ka faydaya oo khashifaya, arrimo xasaasi ah oo ay ka mid yahiin laaluushka wergeysku ku eedeeyey ilaa heer madaxweyne Siilaanyo inuu ka aqbalay shariikadda Genel lacag qadarkeedu dhanyahay 100 malyuun oo dollarka maraykanka ah si ay u hantiyaan qodista ceelal shiidaal oo laga qodaayey beriga Somaliland.

Arrintani ayaa haddii ay dhab tahay waxay fadeexad qaawan oo weyn ku tahay madaxweyne Siilaanyo oo noqonaya madaxweynahii ugu horeeyey ee Somaliland ka taliya oo si toos ah shariikad ajaanib ah uga qaata laaluush lacageed si loo kagana bedesha qandaraasyo iyo heshiisyo saliideed in la siiyo shariikadda Genel, taasi oo dastuurka Somaliland noqonaysa arrin khaayimul qaranimo ah, oo haddii sharciga si dhab ah loogu noqonayo ay xaq dastuuri ah u leeyahiin labada gole ee guurtida iyo wakiiladdu inay arrintani baadhaan, isla markaana madaxweynaha la soo gole joojiyo, laguna soo oogi karo dacwad qarran (Impeachment).

Laakiin Somaliland oo aan dastuur iyo xeer midna aan lagu dhaqmin, isla markaana dastuurka u qorani yahay mid magac u yaal ah, oo keliya xaashiyo duugoobay ku qoran oo xita luuqaddu ku qoranyahay tahay mid iska hor iyo daba imanaysa oo siyaasiyiinta Somaliland uu midiba siduu doono u turjunto, ayaanay hadda macquul ahayn in golayaasha dalka ka dhisan oo noqday fadhiid gacanta ugu jira madaxweynaha iyo xukuumadiisu ay tallaabo inta le'eg qaadi karaan, oo qarranka iyo sumcadda Somaliland bad baadin kari lahayd.

Wergeyska The Wall Street Journal oo ah wergeys ay akhristaan ku dhawaad 100 malyuun oo qof todobaadkii, ayaa qormadani waxay sumcad xumo iyo laf jab weyn ku noqonaysa qaranimada Somaliland, oo lagu shaan badeeyey madaxdeeda laaluush qaatayaal aan waxba la iskaga tirin isla markaana shariikadda Genel Energy ay sida xoolaha uga dhamaysatay heshiisyo.

Madaxweyne Siilaanyo oo sheegta in loo doortay qaab dimuqraadi ah, ayaa u dhaqma qaab ka darran nidaamka diktaatooriyiinta waaweyn ee caalamka la yaqaano u dhaqmaan, isagoo aan jeclayn in la eedeeyo, waraaq ay dhawaan xildhibaanada baarlamaanka ingiriisku usoo direen wasiirka arrimaha dibadda Somaliland ayey ku canbaareeyeen xukuumadda Siilaanyo xadhiga iyo cabudhinta ay ku hayso saxaafadda iyo dadka birmo gaydada ah, waxaana xildhibaanadaasi ay ku sheegeen in arrintani ay dhaawacday qaddiyadii Somaliland, qoraalkaasi oo Halbeegnews goor dhaw isagana idiin turjumi doonto soona gudbin doonta kala soco halbeegnews

Halkani guji oo akhriso qoraalka Wall Street Journal

Source:-Halbeegnews, London

contact@halbeegnews.com